Сингапур полициясы deepfake AI технологиясын пайдаланып, жоғары лауазымды мемлекеттік қызметкерлердің атынан әрекет еткен жаңа алаяқтық схема туралы ескертті. Соның салдарынан бір жәбірленуші алаяқтарға кемінде 4,9 млн сингапур долларын аударған.
Полицияның мәліметінше, алаяқтар жәбірленушімен WhatsApp арқылы байланысып, оны Премьер-министрдің, министрлердің және басқа да жоғары лауазымды мемлекеттік қызметкерлердің қатысуымен өтетін жабық онлайн-кездесуге шақырылғанын хабарлаған.
Сенім ұялату үшін қаскөйлер жалған құпияны жарияламау туралы келісімді (NDA) және жалған ресми хатты жіберіп, кейін deepfake AI технологиясы арқылы жасалған қатысушылармен Zoom-конференция ұйымдастырған.
Осыдан кейін жәбірленушіні ақша қаражатын жалған корпоративтік банк шотына аударуға көндірген. Ол бірнеше транзакция арқылы алаяқтарға сұралған соманы аударып жіберген.
Кейін полиция хат-хабарлар, құжаттар және бейнеконференцияның барлығы алдын ала мұқият дайындалған алаяқтық схеманың бір бөлігі болғанын анықтады. Сондай-ақ құқық қорғау органдары жалған хабарламалардың, жалған профильдердің және осы схемада қолданылған құжаттардың үлгілерін жариялады.
Полиция жасанды интеллект көмегімен жасалған дауыс пен бейнежазба адамның жеке басын растайтын дәлел болып саналмайтынын еске салады. Егер ақша аудару немесе құпия ақпаратты беру туралы өтініш түссе, жіберушінің жеке басын тәуелсіз ресми байланыс арнасы арқылы міндетті түрде тексеру қажет.
