Қытай билігі Камбоджадан қытайлық кәсіпкер Чэнь Чжидің (Chen Zhi) экстрадицияланғанын хабарлады. АҚШ құқық қорғау органдары оны Оңтүстік-Шығыс Азиядағы халықаралық алаяқтық «scam-орталықтарының» негізгі ұйымдастырушыларының бірі деп санайды.
АҚШ Қаржы министрлігінің мәліметінше, Чэнь Чжи мен оған қатысы бар Prince Group компаниялар желісін инвестициялық алаяқтық, романтикалық алаяқтық, фишинг және криптовалютаға байланысты өзге де қылмыстық схемаларды ұйымдастыру үшін пайдаланған.
2025 жылғы қазанда АҚШ пен Ұлыбритания Чэнь Чжи мен Prince Group-қа қарсы санкциялар енгізіп, олардың активтерін бұғаттады. Кейін Камбоджа, Қытай және АҚШ құқық қорғау органдарының бірлескен тергеуінен кейін 2026 жылғы қаңтарда кәсіпкер Камбоджада ұсталып, Камбоджа азаматтығынан айырылып, Қытайға экстрадицияланды.
АҚШ билігінің бағалауынша, бұл қылмыстық желі соңғы 5–10 жылда шамамен 75 миллиард АҚШ долларын заңдастырған болуы мүмкін. Алаяқтық схемалардан әлем бойынша мыңдаған адам зардап шегіп, келтірілген шығын миллиардтаған доллармен есептеледі.
Чэнь Чжидің экстрадициясы Оңтүстік-Шығыс Азиядағы халықаралық алаяқтық орталықтарына жасалған ең ірі соққылардың бірі ретінде бағалануда. Тергеу жалғасып жатыр, құқық қорғау органдары оның сыбайластарын анықтап, активтерін тәркілеп, қылмыстық инфрақұрылымды жою жұмыстарын жүргізуде.
Дереккөз: The Guardian
