Қазақстан Республикасының Қаржылық мониторинг агенттігі (ҚМА) интернет-казинолардың қызметін заңсыз ұйымдастыруға жәрдемдесу фактісі бойынша қылмыстық істі тергеуді аяқтады. Тергеу мәліметтері бойынша, бақылаудағы үш компанияның төлем инфрақұрылымы арқылы жалпы сомасы 191 млрд теңгені құрайтын операциялар жүргізілген.
Схема қалай жұмыс істеген?
ҚМА мәліметінше, төлемдерді жүргізу үшін Қазақстанның әртүрлі банктеріндегі жүздеген терминал пайдаланылған.
Операциялар шетелдік интернет-казинолардың мүддесі үшін жүзеге асырылған. Олардың қатарында:
-
Nomadgames;
-
Sultangames;
-
Pinco;
-
Pin-UP;
-
Vavada;
-
Mostbet;
-
1WIN.
Жүргізілген операциялар үшін есептелген комиссиялық сыйақы көлемі 286 млн теңгені құраған.
Төлемдердің мақсаты қалай жасырылған?
Тергеу мәліметтері бойынша, схемаға қатысушылар заңды тұлғалар мен жеке кәсіпкерлердің деректемелерін, кейбір жағдайларда олардың хабарынсыз пайдаланған.
Олардың атына интернет-эквайринг терминалдары ашылып, жалған шарттар мен веб-сайттар арқылы тауарлар мен қызметтерге төлем жасалғандай көрініс қалыптастырылған.
Іс жүзінде қаражат шетелдік контрагенттерге, оның ішінде криптовалюта арқылы аударылған.
Осылайша, интернет-казинолардың қызметіне байланысты төлемдер кәдімгі коммерциялық операциялар ретінде бүркемеленген.
Қандай шаралар қабылданды?
Қылмыстық іс аясында ұйымдастырушы қамауға алынды.
Соттың санкциясымен төрт көлік құралына және 103 млн теңге көлеміндегі қолма-қол ақшаға тыйым салынды.
Тергеу аяқталып, қылмыстық іс материалдары сотқа жолданды.
ҚМА Қазақстан Республикасы Қылмыстық-процестік кодексінің 201-бабына сәйкес өзге ақпарат жария етуге жатпайтынын хабарлады.
Дереккөз: Қазақстан Республикасының Қаржылық мониторинг агенттігі
