2022–2025 жылдар аралығында Мьянмадан Қазақстанға шетелде жұмысқа орналастыруды сылтау еткен алаяқтардың құрбаны болған 49 азамат елге қайтарылды.
ҚР Сыртқы істер министрлігінің мәліметінше, қазақстандықтарға жоғары жалақысы бар жұмыс уәде етілген. Алайда олар барғаннан кейін скам-орталықтарда ұсталып, алаяқтық схемаларға қатысуға мәжбүр болған.
Азаматтарды елге қайтару Қазақстан дипломаттарының, басқа мемлекеттердің билік органдары мен халықаралық ұйымдардың бірлескен жұмысының нәтижесінде мүмкін болды.
Тек 2025 жылдың өзінде Қазақстанға 20 адам оралды. Сонымен қатар Қазақстан осындай жағдайға тап болған Қырғызстан мен Тәжікстан азаматтарын босатуға да жәрдем көрсетті.
2026 жылдың мамыр айындағы жағдай бойынша тағы 5 қазақстандық елге қайтарылды. ҚР СІМ мұндай жағдайлардың саны мемлекеттік органдардың алдын алу шаралары мен азаматтардың шетелде жұмысқа орналасу кезіндегі алаяқтық тәуекелдері туралы хабардарлығының артуының арқасында біртіндеп азайып келе жатқанын атап өтті.
Мамандар шетелдегі жұмыс ұсыныстарын мұқият тексеруге кеңес береді. Әсіресе тәжірибесіз-ақ жоғары табыс уәде ететін, жол шығынын өз мойнына алатын және шешімді тез қабылдауға асықтыратын ұсыныстарға сақ болған жөн.
Дереккөз: Kazinform
