Stop-Piramida.kz жобасы, Қазақстан Республикасы Ішкі істер министрлігінің Киберқылмысқа қарсы іс-қимыл департаменті және блокчейн-аналитика саласындағы халықаралық AMLBot компаниясы үшжақты ынтымақтастық туралы меморандумға қол қойды.
Құжат цифрлық активтерге қатысты қаржылық қылмыстарға қарсы іс-қимылдың тиімділігін арттыру мақсатында мемлекеттік органдардың, блокчейн-аналитика саласындағы халықаралық сарапшылардың және қоғамдық сектордың күш-жігерін біріктіруді көздейді.
Ынтымақтастықтың негізгі мақсаты – жәбірленушінің өтініші, цифрлық активтердің қозғалысын талдау және қажетті процессуалдық шараларды қабылдау арасындағы уақытты қысқарту. Бұл криптовалюталарға қатысты қылмыстарға жедел әрекет етуге және заңсыз алынған активтерді дер кезінде бұғаттау мүмкіндігін арттыруға ықпал етеді.
Меморандум аясында AMLBot блокчейн-талдау жүргізіп, криптовалюта транзакцияларын бақылауды, криптоәмияндарды сәйкестендіруді, тәуекелдерді бағалауды, сондай-ақ виртуалды активтер қызметін көрсетушілермен (VASP) және криптовалюта биржаларымен цифрлық активтерді бұғаттауға жәрдемдесу мақсатында өзара іс-қимыл жасайды. Сонымен қатар компания қылмыстық істерде пайдаланылатын талдамалық материалдар әзірлеп, цифрлық активтерді пайдалану арқылы жүзеге асырылатын ақшаны жылыстатудың заманауи тәсілдері бойынша сараптамалық қолдау көрсетеді.
Stop-Piramida.kz жәбірленушілерден келіп түсетін ақпаратты жинақтап, жүйелейді, алаяқтық жобалардың инфрақұрылымына OSINT-талдау жүргізеді, жәбірленушілер қауымдастықтарымен өзара іс-қимыл жасайды және қаржылық алаяқтықтың алдын алуға бағытталған ақпараттық-ағартушылық бастамаларды іске асырады.
Өз кезегінде Қазақстан Республикасы ІІМ Киберқылмысқа қарсы іс-қимыл департаменті тергеп-тексерулерді процессуалдық сүйемелдеуді қамтамасыз етіп, қаржы ұйымдарына, криптовалюта платформаларына және шетелдік юрисдикцияларға ресми сұрау салулар жолдайды, сондай-ақ қылмыстық істерді тергеу барысында серіктестер дайындаған талдамалық материалдарды пайдаланады.
Меморандумға қол қойылуы мемлекеттік органдар, халықаралық технологиялық компаниялар және қоғамдық ұйымдар арасындағы ынтымақтастықты нығайтудың маңызды кезеңі болды. Тараптардың құзыреттерін біріктіру цифрлық активтерге қатысты қылмыстарды анықтау мен тергеудің тиімділігін арттыруға, сондай-ақ азаматтарды заманауи қаржылық алаяқтық схемаларынан қорғауды күшейтуге мүмкіндік береді.
Меморандум аясындағы жұмыс жедел ақпарат алмасу тетіктерін дамытуға, блокчейн-аналитиканың заманауи құралдарын тергеу тәжірибесіне енгізуге және Қазақстан Республикасындағы қаржылық қауіпсіздік деңгейін арттыруға бағытталады.
